【由「有」到「好」】
好多朋友問我今年比上年教班係咪輕鬆好多，因為一般黎講教材可以重用，上堂講既內容又係講翻之前啲野。但事實係，我新一個學年比起我上年開始既時候花多左起碼一倍既時間去準備、改良。
.
以前以為最困難既時刻係由「零」到「有」，但做落先知，原來由「有」到「好」亦係另一個需要投放大量心血、精神、時間既時刻。
.
短短半年既時間，我準備既教材已經更新到第三版，由原本上年只係單純重新編制教育局既教材；到第二版加入左大量我既見解同我認為有用既資料入去；到第三版因教育局係新一年出左新版，我又重新更新左舊有既教材。只係計重新編制教材既時間就一定比起我一開始整教材既時間多出一倍有多。到左呢刻，我都夠膽同學生講，你淨係乖乖地上堂聽我講書，明晒所有野，翻到屋企溫晒我啲教材就可以去考試，唔洗再睇坊間既教科書。
.
另外，有左上年加今年既授課經驗，了解到更多學生經常會犯既錯、遇到既疑難、常有既錯誤觀念。令我知道教書既時候，邊啲位要講清楚啲、詳細啲，又再諗多左啲古靈精怪既野幫佢地理解同記憶。見到學生真係明多左，學好左，進步快左，都覺得自己教書都真係有所改進。自己做學生既時候都唔明教學相長係咩一回事，當自己做過老師先知原來教學生真係唔係單方面傳授知識比佢地，原來學生都會教翻你野，令到你不斷咁進步，教與學真係相輔相成。
.
由「有」到「好」真係絕對唔係得把口就得，真係要加多兩錢肉緊，擺多幾分心血先得。今年唔似上年咁匆忙，多左咁多時間比學生有系統咁學習，加上新一年自己更有經驗、扔多左心血落去，希望今年出黎既成績會比上年更上一層樓。
.
#零到有 #有到好既階段 #教學相長 #更上一層樓
Search